बदल

क्षणात बदलणारे भास, क्षणात बदलणाऱ्या भावना, बदलणारी ओळख, परिचय, हावभाव, आसपासची बदललेली पात्र आणि बदलून जाणारं आयुष्य… ह्या साऱ्या गोष्टी कोणत्या वेळी आणि कश्या अचानक बदलतील नाहीच सांगता येत.. कारण कधी कधी तर एक क्षणच पुरेसा असतो हे सगळं घडून जायला...
उन्हातून चालता चालता अनपेक्षित सावली पसरावी सर्वत्र तसाच हा बदल... हे असे बदल घडून येतात, बरेचदा अचानकच.. जाणीवही न होऊ देता एक एक वळण घेत जातं आयुष्य... आणि त्यातून जाताना कळतही नाही की काही दिवसांपूर्वी अनुभवत असलेले सारे काही १८० च्या कोनात पालटून गेलेले आहे, सगळं आयुष्यच वेगळं दिसायला लागतं...
खरतंर आपल्या अपेक्षा असतात येणाऱ्या दिवसांपासून, आनंदाच्या, अनुभवाच्या, यशाच्या आणि आणखी बऱ्याच काही.. पण नकळत होत जाणारी बदलाची वृद्धी एवढी होते की विसरायलाच होतं आपल्यालाही हा बदल हवा होता.. आणि आपण हे अपेक्षीत असलेले आणि अनपेक्षीतपणे समोर आलेले बदल आवडायला ही लागतो… आपल्याही नकळत...